ප්‍රති උපකාර

ස්තුතියි...
ඔබ මට දුන්න පුංචි දේවල් වලට
බොහොම ස්තුතියි...
ඔබ මගෙන් ගත්ත ගොඩක් දේවල් වලට

පාලම

සාදා නිම කල පාලම
බලා හිඳියි
නැකතක් එනතුරු
දේශපාලක
විවෘත කරන්නාට

ර‍ට පෙරට

එන්න ළමයි
ජාතික ගීය කියමු
වැඩ කරන්න
පස්සෙ බැරියැ

පොෂ් දුක

පෙම්වතිය සමග ගෑටූ
පොෂ් හෝටල් ටැග් කරමින්
පොෂ් මිතුරා
පෙම්වතිය හැර ගිය සොවින්
ෆේස්බුකියේ නහයෙන් අඬයි

බේබදු දේවාලය

බේබද්දන්ගේ බදුවලින්
කා බී ජීවත් වෙන
බේබදු දෙවියන්ව අදහන
රජයේ සේවක
සැදැහැවතුන් පෝලිමක්
බේබදු දේවාලය ලඟ

වෘෂභාලය

මස් නොබුදමි
පණ වුවත් දෙමි
පිටරට වෘෂභ සමින්
තැනූ සපත්තු දමා
පෙළපාලි යමි

ධර්මද්වීපය

බලන්න!
මේ නම්,
ධර්මද්වීපයක්මැයි...
"පිරිත්ය
බණය
කැසිනෝය
රගර්ය
මතට තිතය"
පින්වතුනි,
ඉතින්
සාධුකාරයක්
දෙන්න!

අනවසර පිටපත

මංම ලිව්ව මගේම කවි
මං යනකොට පාර දිගේ
මට විකුණනවා
කන්න බොන්න නැති වුනාට
අතේ සතේ හිඟ වුණාට
මංම ලිව්ව මගේම කවි
සල්ලි දීලා ගන්න හිතෙනවා
"ගන්න සර් ගන්න අයියේ
අපේ කාලේ කලා ලෝකේ
නමක් තියලා මැරිලා ගියපු
කවියෙක් ලියු පට්ට සිංදු"

නිහඬතාවය

හදවත
කථා කළ
මොහොත!

වැස්ස

සඟවනු නොහැකි
අහසට උරුම
කඳුලු!

බලු ....... වෙති.

″ හනිමුන් .

″ කෑම බදු සහන.

″ නිවාස .

″ ප්‍රදර්ශන.

″ නීති.

″ අයිතීන්.

″ රට.

″ රජ.

අනිවාර්ය රාජකාරි

කොහේ ගියත් උදේ හයට

එන්නට වෙනවා ගෙදරට

නෝනාගේ සාරි පොටට

ගහන්න වෙනවා

කට්ට!

වැලපෙමු

වැළපෙන්න
තුරුළු කරගෙන
අතීතය
එනවාද
දවසක ඔබ
හැරදා
වර්තමානය

නුඹ

බලාපොරොත්තුව
ජීවිතය
ජීවත් කරවන
කිසිදාක
ඉටු නොවන

වර්ණ...

සුදු පාට රෝස පෙති මත

රතු පාට කඳුලු බිඳු

රටා මවන

අපූරුව..!

විරහව

Flush කල
අතීතයක
ඉතිරිව පාවෙන
වේදනාව

ඇය...

ඉහල සිටින මා උන්මාද කල චිත්‍රා ය

මා...
පහල පහල සිටින මුර සෙබලා ය..

එතකොට කවුද දීඝ ගාමිණී.....?

පළගැටියෙක්

අදුරට
සාප කර
ආලෝකය යට
ගියාය මළගම්.......

මුහුද

නැගෙන
බිඳෙන
ගැහෙන
නිල් පාට හදවත!

විරහව

මගෙන් මාව උදුරා

නිධන් කර

අතහැර දමා සොයන්නට

රැයක් පමණි

සදක් නැති

නිශාචරයෙකු සේ 

නින්දක් නැති

මරණය

විඩාබර
දිවියට
සුවදායී
විවේකය

අවංක කමේ අවසානය

අවසානයේ

අපිටම කෙලවෙනකං

අපිවත් දන්නෑ....

ඕනෑවට වඩා අවංක කම

පෙන්නුවම.....

මේ අවංක හිත

යටවෙනවා හැමදාමත්...

ඒ චපල හිත් ඉස්සරහvv

නුඹ

ජීවිතේ
මද්දහනට
සිහිල්
සෙවනැල්ල

නෙළුම් මලේ පෙති කඩලා

වැවේ පිපුණු නෙළුම්
වටේ නටපු බමරුන්
පරිසර පද්ධතියක සතුන්
ගැවසුනා උදෑසන

වැවේ පිපුණු නෙළුම්
දුටුවා අන්ධ වූ දෑසක්
මිටි පිටින් නෙළූ නෙළුම්
ඇදුණා පුද බිමට

නෙළුම් ගොඩක් සීයයි
පූජා වෙන්නට ගොසින්
වැව දැන් මූසලයි
එහි නැත දැන් නෙළුම්

තාත්ත දන්න ඉටිගෙඩිය

2015දි ඒ ලෙවල් කරන
අපේ මාමගෙ පුතා
ෆේස් බුකියේ ෂෙයා කරල
පොටෝ එකක්...

'ධර්ම දායාදය උදෙසා
සුජාත සිංහල දරු පරපුරක් බිහිකරමු!
පුංචි පවුල රත්තරං
වැඩුණු පවුල ඉස්තරම්'

ආණ්ඩුවට මිඩ්වයිෆ්ට පර්ස් එකට අහුවෙල
මාව විතරක් හදපු
උඹට වඩා ඇච්චොත් දැන්
මාර දියුණුයි තාත්තෙ

අඩෝ දෙයියෝ...!

මිථ්‍යාවෙන් ලොව මුදන බව කියන
මුණිවර අසපුවේ කෙළවරේ කුටියක හිඳ
ලොවම මුලාවෙන් වසමින්
දෙවියන් ෂල්ලි ගරන ෂේක!

පිස්සු හැදෙන වෙලාව

පිස්සු හැදෙන්න
මොහොතකට කලින්වත්
නොහැක
හැදෙන බව දැනගන්න
හැදුණු පසු
කවදාවත් නොහැක
හැදුණු බව දැනගන්න

කවිය මැරුණ ඕයි!

අධර්මිෂ්ඨයන් ගැන
කවියක් ලියා
ඒ අධර්මිෂ්ඨයන්ගෙන්
මා මුදවා
සුජාත කල ඇසිල්ලේ
මියැදුණි
ඒ කවිය

ඇයයි මමයි ලස්සනයි

ලස්සන වෙනවා කියා
ඇය
මිදි හොයන් කන්නී ය
මම වයින් බොමි

නුඹේ කඳුළැල්

පිරි කඳුළැල් සැළුණු නෙතඟින්
බලා හිඳී නුඹ ඈත අහස දෙස
බැලූ මුත් මා නුඹේ දෑස් දෙස
වරම් නැත මට කඳුළු සලන්නට

සිතෙහි ආලය පිරි ඇත තව
නුඹේ කඳුළැල් හිසරක් විය
වැදුනි හද වෙත රිදුම් දෙයි එය
කිරිමට අද කිසිත් නැත මට

පිසින්නට අද නුඹේ කඳුළැල්
සිතුවමුත් මම වරම් නැත මට
දැනුන මුත් දුක මගේ හද වෙත
කෙසේ නම් මා සනසවන්නද?

මහරජ..

අපි නොතැනු 

රට නොතැනු 

ඔහුම තැනූ 

අපිට නොවන 

රටට නොවෙන 

ඔහුටම වෙන 

මගෙ පෙම්වතිය

පටුන බලති
පිටු නොබලති....

බඩගෝස්තරවාඳය ගැබ් ගැනිම

 පවිටු වු,  ආත්මාර්තයේහිම
ආත්මය රැඳි,
දේශපාලනික සලෙලු බවින්

ගැබ් ගත්
උන්ගේ බඩගෝස්තරවාඳය,
ජාතියේ වරඳින්ම
කිසිඳා ගබ්සා‍ නොවනා
හැටි.

බිග් බෑන් තියරි + ♥

බිග් බෑන් එකට කලින්
විශ්වය තනි තිතක්ලු
ඒ තිත හැදුණේ
හැකිළුණු විශ්වයකින්ලු
විශ්වයත්
හදවත වගේ...
ඉපිලෙමින්
හැකිලෙමින්...

ද්‍රව්‍යමය ආසාවන්

සිත් ඉමේ
යහනතේ
කෙතරම් ක්‍රීඩා කලද
ඇයට ඇති
ද්‍රව්‍යමය ආසාවන්
හිර කරයි නුඹ ගෙලින්
අවසානයේ

දිටිමි..

නොවෙනස්ව ගලා යන කඳුළු වලට
ශාප නොකරමි..
ඔබේ සුසුම් වලට
හිර නොවුනත්
දෙනෙත්වල කාන්තියට
පිලිස්සී ඇත්තෙමි

එහි රශ්මිය අදද මා පෙලයි...

වැට කඩොලු

හදවතේ ආදර කතාව
ඔහු දනී...
මම දනී...
අපි, අපි දනිමු
හදවත් අපේය..

ජීවිතයේ Remote එක

ජීවිතයේ සොඳුරු, ලස්සන තැන්  Pause කරන්න තිබුණානං

අමිහිරි තැන්, අකමැති තැන් Fast FWD කරන්න තිබුණානං

මතකයන්, වැරදුනු තැන් REWD කරන්න තිබුණානං

Play කරන්න තිබුණා ජීවිතයේ හොඳ කාලය අයෙමත්....

මල් කැඩීම

ඇට මස් ලේ නැති
හැඟීමක්ද නැති
ලස්සනක් සුවඳක් විතරක් ඇති
කොයි මලත් එහෙමය
බිය නොවන්න
පොඩි කරන්න

සාහිත්‍ය මාසය අදාල නැත

නැග සිටි
පොත් කන්දෙන් බැස
අවට බැලීමි
ඈ සිටියේ
පොත් කන්ද පාමුල ය

ක්ලවුඩ් ජීවිතේ

ක්ලවුඩ් සර්විසස් නිසා දැන්
ජීවිතේ
හාඩ් ‍එකේවත් නැත

බාදුරා මලක මධුවිතට

ලපටි  මල්   කිමි වන් පා ඇති
නිල්ම  නිල්   ඇස්   ඇති
පුංචිම  පුංචි
දගකාර    සමනලයෙක්
යන  සැටි  බලන්  නෑ සුනු කන්
බාදුරා  මලක 
මධුවිතට

දැන්විමයි...

ආදරය...මගේ විකිණිමට තිබේ
ණයට ඉල්ලා අමනාප නොවන්න...
එසේ කිරිමෙන් ආදරයත්, මාත්, ඔබත් ..
යන තිදෙනාම මට
නැති වේ...

මැජික් බඩු

සුපිරි සාප්පුවේ සැරිසැරු
මැදපන්ති පාරිභෝගික මම වෙමි
වීදුරු පෙට්ටිවල තිබෙනතුරු
එහි බඩු වලට මම බිය වීමි
මිලදී ගත් පසුව ඒ බඩු
බිය විය එහි අලෙවිකරු

නිහඬ බව

සමරමු
නගා
ජය
ගොස

ෆේස්බුක් හොටු

රට්ටුන්ට පෙනෙන්නට
සැබෑ ලෝකයේ සිනාසෙමි
කඳුළු හොටු අඳෝනා වැළපිලි සියල්ල
ෆේස් බුකියේ අතාරිමි

සඳ

සඳ ගැන කවියක් කීවා මතකයි

පෙර දින නුඹ මට හැන්දෑවේ...

ඒ සඳ කවුදැයි ඇහුවා මතකයි

දින ගනනක් මම හැම වේලේ...

පිලිතුරු නැත අද නුඹ ගොළුවී ඇත

හෙව්වා හේතුව පෙර වාගේ...

ඒ සඳ මම බව තේරුම් ගත් විට

නුඹ නැත මම ලඟ පෙර වාගේ...

ආරම්භයක් නැති අවසානය

ආදරය කියා ගන්න
අකුරු ගලප ගන්න බැරි
මම.....
කොහොම වචන ගලපන්න ද
කවි ලියන්න......

ratings අඩුවන කල

වෙනස්වෙයි කාර්යමණ්ඩල
නිවේදකයෝ වෙති නළු නිළි කැළ
මහිමය එයයි සැම කල
කාගෙත් නාලිකාවල

පැරදුම

ප්‍රේමයේ උඩුගං බලා පිහිනූ
කින්නාරාවිය
සියල්ල හැරපියා දියේ ගිලී
මියගිය පුවත
අද උදෑසන සයනයේ සටහන්ව තිබුණි.

නමට නොහොබී

උපාංගද බෝ ඇති
තවමත් වැඩක් ගෙන නැති
නමට නැති වැඩ ඇති
ජංගම නිසා සිත් ගති

දෙවැනි දෘෂ්ටිවිතානය

මකයි, ඇස හා තිරය'තර

කෘත්‍රිම අවකාශය

හසුරුවයි පවුල් වුව සිතැඟි ලෙස

ගෙයි මැද සාලයේ රූප පෙට්ටිය

කලු සුදු ආදරය...

එහේ මෙහේ ගිය ඉරි කෑලි
සුදු කොලයට කලු පාටින්
රටා මවපු......
වර්ණ අතර, අතරමං ව
චිත්‍රය ඇදපු....
සිත්තරා මං..

අලුත් පණක්

මගෙ ඉහේ
මල් දාහක් පිපුණා
ඔයාගේ ෆෝන් එක
ආයෙත් හුස්මගන්නවා ඇහුණම

ඇමරිකන් ලයිටී

coke එපා කියන 

විමල්..

රැට රැට රතු පාටට 

දිලිසෙන 

එපා කියන්නකෝ 

ඇමරිකන් ලයිටිටුත්

ඇයි අදම

බස් එකේ අසුන් හිස්
හිටගෙන යන්නයි හිතන් හිටියේ අද
අසුන් තිබිලත් හිටගෙන
මිනිස්සු එහෙම හිතත් ද?
ඉඳගෙන නැගිට්ටම මම
මිනිස්සු එයම දකිත් ද?

වතක මහිම

හුදෙකලා, නිහඬ

හදවතක රුව

දිසෙන ඔබ වත

නොවේ අමතක

මේකම දෙන්න

මේක කීයද?

අරක කීයද?

අනික කීයද?

"මේක" දෙන්න

මං එනතුරු

පේර ගෙඩියක් කඩාගෙන

තැඹිළි ගෙඩියක් කපාගෙන

බසයක හඬ අසාගෙන

පාරට කන් යොමාගෙන

දැන් එතියි මග බලාගෙන

තාත්තා ඇති සිනාගෙන

ඩේටා ලිමිට් සහ පොත්

ඩේටා ලිමිට් පැන ඇත
අන්තර්ජාලයේ
දැන් ආයෙත්
මමත් පොත් කියවන්නෙක්මි

බිඳුන හද

හද බිඳුන තරමට
හදන්නට බැරිවේයිද ආයෙත්...
වැහැරී ගිය ඒ හිත හදන්නට 
කවදා හෝ දෑත දේවිද ඈ ආයෙත්...

හිස් මළ මිණි

ජීවිතයේ හිස්කම පුරවන්නට
සකල දෑ කළෙමි
සියල්ලට ආසා වුණෙමි

ජීවිතය පිරුණු පසු
ඉල් පලක් නැති වී
ආසාව මියැදී

මා මළ මිණියක් වී...

වාහන නැත්නම් කහ ඉරි කුමට.........

ඈ,

නියම බිරිඳ,

කහ ඉරමත මියැඳුන,

මෑ,

අනියම් බිරිඳ,

රථය පදවාගෙන ගිය,

මා,

ඔලමොට්ටල සැමියා?

වාහන යා හැකි මගේ

කහ ඉරි ඇන්ද?

එහෙමද? නැත්නම්...

කහ ඉරි ඇන්ද මගේ

වාහන යන්නට ඉඩ හැරිය?

හිත

පරිගණක තිරය ළඟ
හිස් වන
පොතක් ළඟ
පිරෙන

මංගල දැන්වීම

වචන පහලොවක
සිරකල
අනාගත
සුභ සිහිනය

අපේ කාලයේ ප්‍රවෘත්ති

මෙන්න ප්‍රවෘත්ති
හැමදාම නෑ
හැමතැනම නෑ
ග්‍රාහකයිනි,
මමනම් බයයි
නුඹත් බියවන්න
පේනවනේ
මෙච්චරක් මැරිලා
මෙච්චරක් තුවාලයි
ලැබෙන සැණින් එසැණින්
තවත් මරණ ප්‍රතිඵල

හාමත් කුස

ලැජ්ජ කළා මට

හඬ නගා

උදේ රැස්වීමෙදි

භාවනා කරන නිහඬ මොහොතෙදි

ගැහැණිය

පිරිමියා
පාලනය කළහැකි
දුරස්ථ පාලකය

ආදරය

නුඹ

දුන්

කඳුළු කැට....

නුඹ

සිපගත්

කම්මුල් මත...

අහක යනවට

පූස්,

අද මොකද

නෝනාගෙන් අපට

පිටිකිරි?

ඔව් බව්වා

නෝනා අද ලෝබ නෑ

ඊයේ ළමයාටවත් දුන්නැහැ

මං අහගෙන,

කිව්වා පූසටයි බව්වටයි දෙමු එව්වා

ගොළු යථාර්තය...

නුඔට තාම දැනිල නෑ
උණු වුණ ඒ හිතේ ගින්දර
නුඔ තාමත් දැකල නෑ
කදුළු පිරුණු ඒ දෙනෙත්

ආදරේ කලා ගොඩක්, සත්තතමයි
නුඔට අමතකයි ඒ සොදුරු අතීතය
අහිංසකයි නුඔ හැමදාමත්
ඒත් ගොළුයි ඔබේ යථාර්තය තාමත්

සිහි කරන් ඔය මුහුණු
හිරකරන් ඒ මතකය
මියැදෙනවා කාටත් හොරා
නුඔට ආදරේ ඒ පණ.....

ඔබ

සුළඟේ පාවී
දෑත මත රැඳුනු
මුදු කුසුම
රඳවා ගන්න පින් මදිවූ

සංගීතකරු මැරිල...!

වැයූ තත් හය නිහඬ වී...
හිඳී මුල්ලක කිලුටු වී...
තත් වැයූ අත් පලුදු වී...
යතුරු පුවරුව මතට වී...

ලියූ කවි පද නිහඬ වී...
සිනාසෙයි මට උඬගු වී...
කවි ලියූ කොළ රුදුරු වී...
ඉල්ලයි මගෙන් උත්තර හරී...

නොදුන්නොත් උත්තර හරී...
කෙළ වෙනව මේ පාරත් money...
අරන් degreeය බී Sc...
අපි කරමු music මගෙ honey...

රුපියල් 25

25 ට 25 ක් සෙට් වෙන තැන...!
ටී ද,  ප්ලේන් ටී ද, හොඳ...?

මදුවිත

නුඹ පමනි
අද තනියට
කාලය පියඹා ඇත
සියල්ල අහිමි කර

සඳ නුදුටු සඳ (දැන් එපා)

කොන් කඩා තරුවල
අතුල්ලා ගලක් මත
ඇලෙව්වෙමි අහසමත..
හරියටම නොවුනත්
රවුමක් ලෙස..
ලෙලෙන දිලෙන තරු
එලිය වුව.. මවාගනිමි
සඳක් ලෙස....
දැන් එපා හඳමට..!!!

නුඹ

ඉඩෝරයට
පසු
ඇද හැළුනු
මහ වරුසාව
සියල්ල
සුණු විසුණු කල

ආදරය

නුඹට නොදැනෙන
ම හද උතුරන
ලොවම නොදකින
රහසේ මියැදෙන

පාට කල ජීවිතය

අනෙකා ම දෙස බලයි කියා
කොණ්ඩය ටින්ට් කළෙමි
පච්චයක් කෙටුවෙමි
නහය විද්දෙමි
දිවත් හිල් කළෙමි

බල්ලෙක්වත් බැලුවේ නැත
හිල් කරන්නට තැනකුත් නැත
මැරෙන්නට හිතයි දැන් මට

ඇය

බිහිසුණු
අතීතෙක
සොඳුරු
වර්තමානය

පෝ දා බණ | එපා වීම

පසක් විය එක මොහොතක
ආසාවෙන් ළංකරගත් සියළු දේ
දිනෙක එපා වන බව

විරහව

තුවාලය
නුඹ
කසන
මම
විඳවන

අපේ නොවන අපි

සයනයේ නොව
ආදරය මත
දොඩමළු වෙමු,
හදවතින්
තුරුළු වී..............

සයිබර් මෑන් (2013) | නූතන සුපිරි වීරයාගේ කතාව

උපතින් ලද බලයක් නැතත්
දියුණු කරගත් දස්කමක්ද නැතත්
මා වීරයෙකි හතර අත නෙලන
සයිබර් ගුවනේ පියාඹන

Nona ගියා Annual ට්‍රිප්

හුරේ....
අද set වෙමු
හප්පට සිරී 3න් වේල???

සීරියස් පුනරුත්පත්තිය

මා පියාගේ හදවතින් ගලා ගිය
රුධිරයේ දියව තිබී
පෙණහළුවෙන් නික්මුණු
හුස්ම හා මුසුව
වාතලයට වන්
ජල අණුවක්
ඉහල අහසට ගොස්
වැස්සෙන් ඇද වැටී
ගෙදර මිදුලේ බෝංචි වැලක
කරලකට උරාගෙන...

ඩාක් නයිට් සහ මල්සිරි

තමන්ගේ 'බිය' වූ
වවුලකු බවට පත්ව
බිය අතික්‍රමණය කල
ඩාක් නයිට්වරයා දැක
මල්සිරි කල්පනා කලා

...

දැන් ඔහු දේශපාලකයෙක්!

කලාවන් දොඹකරය

මිනිසුන් ඉහළ ඔසවා
වැඩි ඉඩක මිහිර පෙන්වූ
කලාවන් නම් වූ දොඹකර
එසවෙන්නට ඉසිඹු නැති
අලසයන් නෙතට හසු නොවී
මළ කමින්...

Naදී...

සිසිලස ගෙනෙයි ඔබ හැමටම     Naදීය....

සද එළි‍යෙන් හිරුකිරණින් නැහැවෙයි  Naදීය...

මහ වෘක්ෂ වන මැදින් රැක ගනියි ඔබව   Naදීය....

සිහින් ලතාවට ඈතට ඇදීයන    Naදීය...

මහ සයුර හමුවෙයි කවදාක හෝ ඔබට   Naදීය.....

මනරම් ගැලපුමකි.....

ආදරය,සෙනෙහස,භක්තිය
ඉර්ෂ්‍යාව,ගෝරනාඩුව
රන්ඩුසරුවල්,සිත් තැවුල්
ඇනේමන්දාවකි...
ඇගේ/මගේ... ආදරේ

මට එරෙහිව මම

අවසානයේ
ලෝකයේ එදිරිකම්
තුනී වි යයි
මා නැමැති සතුරා
ඉතිරිව

අටවකදා හඳට

ඇයි මේ
කෙට්ටු වෙලා

බඔරා...

රෝස මල් මිටි තිබුණාට...

ඔබරු රොත් හිටියාට...

එක මලයි තිබුණෙ බඔරාට...

එමල හැර නොයමි කිසිදාක...

කැකිල්ලේ රජ්ජුරුවණි...

අමාරුවෙන්
කෝටු අරන්
 හදපු
පුංචි කූඩුවේ..
කොහෙක් ඇවිත් බිත්තර දාලා

කෙටිකතා කරුවාගේ සමුගැනීම

යන්නං
මචං

ඔයා පොතක්වන් ජීවිතයක්!

ජීවිතේ නම් පොතේ
පිටු ඉරී ගැලවී ඇත්නම්
එය කියවූ එකක්

පිරිසිදුව නොකිලිටිව ඇත්නම්
කිසිවකු නොඇල්ලූ
රහක් නැති එකක්!

සල්ලාලයෝ

තරුණියක් කෙලෙසන්න දඟ දැමූ
සල්ලායන්ට නෙලා
ඇය බේරා ගත් තරුණයාට
ඇයව කෙලෙසන්න
අයිතියක් ලැබේද?

හදිය

දෙතොල් වියළී
උගුරු දණ්ඩ සිරවී
සිරුරේ රුධිරය උණුවී
වැගිරෙමින්
මා කම්පිතව ගිය
හදිය කැටි
රියේ ඉදිරිපස බුමුතුරුණේ රැදි
කොණ්ඩා කටුව කාගෙද

කටු මතකයට උත්තර

යනෙන තැන මරුවැල්ය
ආදරේ ගිනිදැල්ය
ජීවිතය නැතිකල්ය
දැනෙන්නේ තනිකම්ය

සිත් අහස ගැබ්බරද
අත් පසුර හිස්වුනිද
නෙතු කැල්මේ කඳුලැල්ද
ප්‍රේමය ම මියගොස් ද?

අවට ලොව නොම සිතන්
අතීතය අත හරින්
ප්‍රේමයේ සුභ දකින්
ජීවිතය කියවපන්..!

වෙනස

ප්‍රියතෙපුල් තෙපලමින්
ඔබට තුරුල් වී
දඬු මොණරේ
ඉගිලෙන්නට පැතූ මා
රියදුරු නිල ඇඳුමට මුවා වී
සැප පහසු රියේ
පසු පස අසුනේ තනිව
සිරකාරි වී

ඇළුමිනියම් බස්

ඇතැම් බස්වල
පොළුවලින්
ලැබේ නොමිලේ
ඇළුම්නියම්

බොග

ඇඟ මහ ජරා යන්ත්‍රයකි
අපි කන රස සුවඳ කෑම
ගඳ ගස්සවා පිට කරන

නාඳුනනා අංකය

රෑ තුන් යම නිදි නොමැතිව
හිත කීරි ගස්සන
සැකෙන් නිතර වද දෙන
ඔබේ දුරකතනයේ දිස් වූ
වැඩිම වරක් එහා මෙහා කරකැවුණ
නොහදුනන අංකය
පිළිකයක් වීද කුලගෙදර
සියල්ල වනසා දමන

රට පොරට

ගුගල් ලූන් උඩ‍ට
පිට රට පෙරට
ඉන්ටනෙට් ගුගල්ට
රට පොරට


පොර = පොරය හෙවත් වලිය

හිච්චියේ

රන් දොලාවෙන් නුඹ කැන්දන්නට
කෙනෙක් නැතුවට කම් නැත
නුඹ නාඩන් මයෙ හිච්චියේ
වැලේ ගෙඩිය බර නෑ වැලට
මගේ හුස්ම යනතුරු මන්
නුඹ රැක ගන්නම්
රත්තරනේ
රට්ටුගෙ කට වැට බදින්න
අපට ඇහැක්දෝ

සුන්දර වෙන්න ටිප් එකක්!

අසුන්දර මිනිසුනි
මීගොඩ ආර්ථිකේ
ඉවතලන පළතුරු ගොඩවල් ඇත
යන්න මුහුණ ඔබාගන්න
නොමිලේ සුන්දර වෙන්න

පිළිම අඹන්නා

මිනිසුන්ගේ
විශ්වාසයන්
මැටි පිඩකට
ගොනු කරමි

අපහරණය

කෙලෙසීය තම කැකුල
පුබුදුලුවලූ පියාම
දිලිඳුකමට එරෙහිව
ඉසුරු සොයා
මව් නැව් නැගි සැනින්
පරෙස්සම ඈලියාවට ගිය හැටි

මාර පාර

පාර දෙපස
ගස්වලට ලොල්ව
දේශපාලුවා
පාර පළල් කලා

මංගල මුදුව

වෙදඟිල්ලෙ සිර කල
රන් බෙරලයෙන්
ලොවම දුරස් කර
එක්ටෙම් ගත කල වගයි

චූචි චීචර්!

ටීචර් නැති
පන්තියක්
ලෝකය

උදෑසන

තණ අග රැඳි
පිණි බිඳුව
මරණය අයදින
ජීවිතය

සිහිවටනය

පෙරදා ඔබගේ
දසෑඟිල්ලේම නැලවුන
සොරාම මා අයිති කර ගත්
මගේ ඈදුම් බෑගයේ නිදන් ගත
උපන් ලපයක් සේ මතකයේ රැඳුන
පුංචි යතුරු රඳවනය
ඔබටත් තවම මතකද

දෙවියන්ද ෆන් ගන්නා සේක!

දෙයියො ලෝකය මැව්වෙ
අපිට ආදරේට නෙවෙයි
උන්දැට ෆන් එකේ ඉන්න

දැන් තමයි උන්දැ
හොඳටම ෆන් ගන්නෙ

අපි තමයි උන්දැට
හොඳට ෆන් දෙන්නෙ

ප්‍රේමාන්විත රංගනය

මල් යහනේ සතපවා සිනිදු සේල වින්දනය..,
ගෝර කටු මැද කදුළු සලා විලාපය..,
සියල්ල නිමාවිය.
උන්ද දැන් මහලුය..

ඔළුව පලන වීඩියෝව දැක්කද?

කාර්යාල ජීවිතයේ
දවස පටන්ගන්න කලින්
කලින්දා ප්‍රවෘත්ති අහන්න

දැක්කද අර වීඩියෝව
ඔළුව හතරට පලන
ටීවි එකේ ගියා
අපි ඔක්කොම බැලුවා

ග්‍රීස් සහ දාඩිය

යන්ත්‍රයක් වූවා නම්
දැරිය නොහැකි තරම්
කැරකුණු විට
කැඩී යයි

අපි මිනිස්සු නිසා
දරන්න බැරි තරම්
දරාගෙන
තවමත් දත්මිටි කාගෙන

හැලීම

ඉන් ඉක්බිති

සියලු දෙනා

දේශන පවත්වා

උද්ඝෝෂණ කර

හලාල් වලට විරුද්ධව

අරාබි තෙල් ගැසූ

බස් වලින්

ගියාහුය

නිවෙස් වෙත....

අනේ ඌ දන්න xxxxxx!

පොඩි කොල්ලෙක්
විවාදයක කෑ ගසයි
'අන්තර්ජාලය
ලෝකය විශ්ව ගම්මානයක් බවට
පත් කර ඇත'

මට හිනාගියා
විශ්ව ගම්මානයේ මුල්ලක
වැටකින් වටව අපි
අපේ ගොඩවල් හදාගෙන
තාමත් ගොඩේ ෆන් ගෙන

අනේ ඌ දන්න අන්තර්ජාලය

රෝල්ස්

හැමෝටම ගසන්නට
කුමක් හෝ රෝලක් ඇත
කිසිවෙක් දිළිඳු නැත
අරගල කරන තරමට

බලු අදහස්

ගේට්ටුව ඇතුලෙ හැදෙන බල්ලන්
එලියෙ ලෝකය නොදත් මෙන්
අදහස් ගේට්ටු තුල සිරවූ සිත්
ගේට්ටුවෙන් පිට කිසිත් නොදත්

වර්චුවල් තම්බ්ස්අප්

මා වෙනුවෙන් දිවි පුදන්නට
හඬ නගන්නට
අයෙක් වේ නම්
මම ඔහුට සහය දෙමි
එක සිතින්
වර්චුවලි...

වලිගෙ

පරිණාමය සමග
අපේ වලිග
හැලි ගොස් ඇත

පරිණාමය නොවූ ඇතමුන්
තම වලිග
නිතරම පාග ගනිති

වැහි වලාවේ

නිරිත දිගින් හමනා වැහි වලාවේ
රුහුණට මාව සිහිකරපන් වලාවේ
සබරගමුවෙ වැහි අප්පුලා මලාවේ
කොළඹ රටට වැහැපන් වැහි වලාවේ

උයා තමා දිනුවෙ!

සල්ලි ටිකක් දෙන්න කියල
රේඩියෝ අක්කෙක් කතා කලා
ඔව් ඔව් ගෙදරටම

‘මේ වෙලාවෙ ඔයා මොකද කර කර හිටියෙ?‘

‘මේ වෙලාවෙ මම ටීවී බල බල හිටියේ‘

චිරං ජීවතු කිංස්ඩුව් මව්නි,

ඒ අපූරු නිවහන,
ජීවිතේ කියාදුන්න්,
ජීවිතේ සොයාදුන්න,
රත්තරං පිං කෙත,
කවමදාකවත් අමනක කරන්න බෑ.....

ඉතින්..
එක් සිය දෙ විසි වසරක,
අභිමානවත් රාජ පෙළපත,
තව සහස් කල් දුර දිනන්නට,
සදාදරණීය කිංස්ඩුව් මව්නි,

ඔබට චිරං ජීවතු. චිරං ජීවතු. චිරං ජීවතු !!!!

සින්දුයි කසාදෙයි!!!

සින්දු රිපීටි වෙන නිසා
එපා වේ කාලෙකින්

අයියෝ කසාදේ

හද

හදේ නෙතු

කැලුම් පොදි

නුඔට පිදුවා

අවංකව මම...

ඈ නිළියක් නොවේ

වෙඩිම පුරාවට
මනාලිය සිනාසුනා
ෆොටෝග්‍රැපර් හතර අතට
‘හා දැන් අඬන්න‘
කණට කර ඔහු කීවා
මනාලිය අඬන්න ගත්තා
ෆොටෝග්‍රැපර් හතර අතට

විහිළුවක කාලාර්ථය

විටක මිහිරිය
සිනහ බෝමය...
විටක අකැපය
හැඬුම් බෝමය...
වටහා දෙනු මැනව
විහිළුවක, කාලාර්ථය
ගැහැනියට සාපේක්ෂව

යක්ෂමතාවය

ඔපීසිය අකාර්යක්ෂමයි කියා
ගෙනාවා කොම්පියුටර්
දැන් හැමෝම
කාර්යක්ෂමව ගේම් ගසති

අඳුරට විසඳුම

උස් බිමක මම හැදුවා
පුංචි වැවක්...
වැහැපන් වැහැපන්
නොනවත්වාම වැහැපන්
පිරෙන්නට මගේ වැව
හදන්නට ටර්බයිනයක්

පෝය දා රෑට පන්සල

පැණි පෙරන
සිල් වඩන
පෙම් පුරන
පිං වඩන
දනෝ

එති...
යති...

පහන් දල්වති
පැන් ඉසිති

නිවන් දකිති (?)

අපොයි මහගමසේකර!

ලෝකයේ කර්කෂ
ගැටුම් මැරුම් හිංසන
නොරිසි ව
රිංගුවා අන්තර්ජාලෙට

අයියෝ!

දැන් ලෝකයම
තනි යායක් වී ඇත

සිහි වුණා ප්‍රබුද්ධ
අපොයි මහගමසේකර

ආතල් ඕයි සංවේදී ජනතාව!

ජාතික ප්‍රශ්ණ ගැන
සාමාන්‍ය මිනිස්සු අසංවේදී විට
උන්ට බනියි
සංවේදී ජනතාව
'තොපි අන්ධ ජාතියක් යකෝ'

ජාතික ප්‍රශ්ණ ගැන
සාමාන්‍ය මිනිස්සු සංවේදී වන විට
උන්ට එකතු නොවී
ආයෙත් උන්ට බනියි
'ඕව කරල හරියන්නෙ නෑ යකෝ'

ජාතියේ පින සංවේදී ජනතාව

you tube වර්මොහොලික්

ගෙවෙන ජීවිතය
එපා වූ මොහොතක
පලායමි
වෙනත් විශ්වයකට
යූ ටියුබ්
වර්ම්හෝලය තුලින්

විදුලි බිලට අත නොතබනු!

උන් විදුලි බිලට අත තියයි

විදුලි බිල වැඩි කර
ලාභ උපයා
අළුත් යන්ත්‍ර ගෙන
බිල දෙස දෑහින්වත් නොබලා
ඔටෝ ජෙනරේට් කර
ගෙදරටම එවන්නට
පටන්ගත් පසු
උන් ඊට අත
නොතබනු ඇත

පිළිමය

අවුවට කරවෙමින්
කුරුළු බෙටි
වැස්සට හේදී යමින්
පිළිම අඹන්නාගේ ගෙමිදුලේ
විකුණන්ට තිබූ පිළිමය
නොදුටු මිනිසුන්
එය හන්දියක
මලසුනක් මත ඇටවූ පසු
නමදිමින් යන අපූරුව!

එ තරම්

නො බිදෙන බදුන්

තිබුණ මුත්

බිදෙන

බදුනට ම

සිත - ගිය

අරුමය...

හෝම් තියටර්

මගදී pause කර
ඊ මේල් බලන්නට
‍ෆේස්බුක් යන්නට
රිඩරේ කියවන්ට
නොහැකි නිසා මම
නොබලමි
හෝල් එකේ චිත්‍රපට

කරාමය/කරුමය

විනය නියෝග නියෝග නිකුත් කලා
දෙපාර්තමේන්තු කම්කරුවාට
උතුරන ජල ටැංකියේ
කරාමය වසන්නට දිව්වාට
ජාතික ගීය අතරතුර

life (2013) | වැඩිහිටියන්ට පමණයි!

අක්‍රිය මා
පසෙකට ඉඳුවා
ඉදිරියේ දිග හැරෙන


ජීවිතය
විටෙක
චිත්‍රපටියක්

සමූහ මිනී වල

ටිකක් ගොඩගන්න
සමූහ මිනීවලේ
සේරම ගොඩ නොගෙන...

ඉතිරි ටික
හිමීට ගොඩගමු
හත් අට වතාවකදි

අප්‍රේල් 16

අප්‍රේල් 14 අවුරුද්ද ඉවරයි
අප්‍රේල් 15 නෑගම් ඉවරයි
කැවුම් ටිකක් ඉතිරි වුණාට
අප්‍රේල් 16 අපි ඉවරයි

රේඩියෝ

සවන් පිනවන්න 

තරංග සමග 

සංසර්ගයේ යෙදෙන 

නාලිකා

නිදිකුම්බා ගහේ
කටු ඇණුනට
කොහොමද පිළිගන්නෙ
නපුරුයි කියලා
පුංචි දේටත්
ඇකිළෙන හැටි දැක්කම...

ව්‍යාකූල හදවත

සැලෙන මන.....
සක්මන් කරවයි නුඹව..
මායාවත්.... , යතාර්තයත් අතර
නොමදෙනු මා සොදුර
කැඩෙන්නට පිට කොන්ද

I love OS

Ios නම් අධික සීතලං
Windows නම් සෙවල පටිත්තං
Fedora නම් මට විලම්බීතං
Ubuntu නම් අග‍්‍ර බෝජනං

අනුවණ මල

මලක් නොපිපෙයි ඉරක් නොමැතිව
ලොවම දන්නා යථාර්තය එය....
මලට බඹරෙකු පැමිණි පසුවද
නොකියන් මලේ....
හිරුට පිටුපා, එන්න බැරි බව...

සඳට පවසයි තරුව

සඳ තනියම පායන්න සිතුවත් හැමදාම
දිනක් එයි අමාවක...  ඉඩ නොදී පායන්නට
එදින වැටහේවි.., ආඩම්බර සඳට
තරුවක වටිනාකම.....

ක්ෂිතිජයේ යතාර්ථය

සොඳුර නුඹ සයුරකි......
ආදරය, සෙනෙහස දෝරගලනා
ගිලී සිටින්නට සදාකල්, ඒ ආදර සයුරේ
සිතුවත් මා....
වටහා දුන් විට ඔබ, හිරු සයුරේ නොගිලෙන බව
වටහා ගත්තෙමි... ක්ෂිතිජයේ යතාර්ථය.........

පුරහඳක් වෙලා

නුඹ

එළිය දුන්

හැම දාම

හිතට ආ

හැම දේම

කියන්නට

හිතුනාම

එදාම

අමාවක.....

නුඹව
මගෙ කරගන්න

මම විඳපු දුක්....

නුඔව

මගෙ වෙලත්

තව

මම විඳින

දුක්......

ඔන්න කිවුවා
සිත්තරාට
මගේ සිතුවම
මටම ඕනි...

දුක..

ඉපදුන නිසාවෙන්ම
උහුලන
කරුමය නිසාම
විඳවන
අප්‍රසන්නම
හැඟුම් සමුදාය....

තනිකම

තනියම අහසට නැගුණ ගහකින්
උඩට ආපු තනි අත්තක
තනිකඩ කුරුල්ලෙක්
තනියම ඉදගෙන
තනි වලාකුළක් තියෙන
අහස දිහා බලාගෙන..