October 21, 2022

සුළු ආදරය

වෙරළ සේදූ රළක්
යළිත් මුහුදට ගලද්දී
දැවටෙන පෙන රළු වැලි මත
මොහොතක් වැඩිපුර රැඳෙයි
සර සර හඬින් පිපිරී යයි
එහෙම
ආදරේ ඉතිරි වෙන්නෙම
පොඩි පොඩි තැන්වල
පොඩි පොඩි වෙලාවකට

 

ලියා එව්වේ - Hare :-)

October 19, 2022

දෑස කට සහ මාස්ක්

සිනාසෙන දෑසට යටින් විරිත්තයි
හඬන දෑස සමග සිනාසෙයි
සතුටු දෑසින් දත්මිටි කයි
දුක් දෑස සමග මන්දස්මිතයි
දැන්
දෑස සමග සබඳතා නැත
මාස්ක් එකට වැසුණු කටට

 

ලියා එව්වේ - Hare :-)

October 18, 2022

ඇඟලුම

සැම උදෑසනක
අවදිව දත් මැද
සෝදා මුව සූදානම්ව
ඇඟලාගමි
සිනහව පිරි
අනෙකාගේ මම නම්
ඇඟලුම
 
ලියා එව්වේ - Hare :-)

February 22, 2022

තහනම්!

තනි පාට කපරාරු 
ලස්සන තාප්පවල 
වස කැතට මැද තඩියට 
දැන්වීමක් ගසා ඇත 
දැන්වීම් ඇලවීම තහනම්
 
ලියා එව්වේ - Hare :-)

March 25, 2021

ආණ්ඩු සහ සොමි රැළි

ඉඳ හිට හෝදන් ගියත්
වෙරළ යළි ගොඩනැගෙයි
සියලු රැළි වෙරළේ වැදී බිඳී යයි
ඉතිං ඔබ එන්න රැළි හදන්
අපි වෙරළ වෙමු


ලියා එව්වේ - Hare :-)

March 21, 2021

ආමි නේවි එයා ෆෝස්

නිදහසේ වටිනාකම තියා
එහි තේරුමවත් නොදනිත්ද
මියන්මාරයේ ගිණි බිඳින 
අණට කීකරු යකඩයන්

උන්ට ඇත්තෙවත් නැද්ද ඔළුවක්
වැලපෙන හෘද සාක්ෂියක්
අරගලය ෆේල් යැයි සිතුවත්
දිවි පුදයි මිනිසුන් තාමත්

වචනෙන් රචනයෙන් ලස්සන
මනුසත්කම මහ මුලාවක්
ලෝකය එක යායක්නම්
ඇයි රටක් ගානෙ හමුදාවක්


ලියා එව්වේ - Hare :-)

March 10, 2021

උයන!

මල්ද පරව යයි
පත් වියලී වැටෙයි
උයන්පල්ලන් ස්ථාන මාරු වෙයි
උයන දරා වැජඹෙයි!

ලියා එව්වේ - Hare :-)

March 5, 2021

කිල් මයි ඩිජිටල් ලයිෆ්

මිනී මැරුමක
පවුල් අවුලක
පශ්චාත් ගොසිප්
දිග බුකි ලොජික්
පින්තූර නරඹමින්
හෑලි කියවමින්
තියරි හදමින්
දැනුවත් වෙමින්
අනුනුත් අප්ඩේට් කරමින්
ජනතාව හරි සතුටින්


ලියා එව්වේ - Hare :-)

March 4, 2021

පරණ මිනිහා

පේනවාද පිරිමි ගෑනු
නිදහස සොයන් යනවා
එක් හිතකින් ඈත් වී
වෙනත් එකකට ලං වෙනවා
මරණයත් ඉක්මවන් යන තරම්
ආදරේ වගෙ එකක වෙලෙනවා

ඉතින් ඒ පෙම් කතා වේදනාවක්නං
ඒ කනින් අහලා මේ කනින් විසි කරන්
හිත හයිය කරගනින්!
මොකද උඹ තාම
එක හිතකට ආදරේ කරන එක
ලෝකෙ හොඳම දේ කියල හිතන
පරණ මිනිහෙක්

ලියා එව්වේ - Hare :-)

July 3, 2020

ඝණ ද්‍රව වායු

'හරි අමාරුයි ඝණ එක්ක
ගිහින් වදිනවා හැම තිස්සෙම'
ද්‍රව එහෙම කිව්වා

'ඒකට මට....'
වායු කට ඇරියා
'මට උඹෙනුත් කරදරයි ද්‍රව...'

ඝණ නිහඬවම හිටියා

ලියා එව්වේ - Hare :-)