සෝදිසි

ළපල්ලක මුදු තොල් උරා බී
කර බදන් නිදි පිනි බිඳක් දැක
හිරුගෙ මුල් රැස් දහර පිළිබඳ
ඉතා සෝදිසියෙන්ය තුරු හිස...

Massage Clinic

ඇස් බැඳගෙන
මස් මිරිකමි
ගෙදර ගිහින්
කුස් පුරවමි

ඇළ

ඇළ හොඳින් හැඳ පැළඳ
ඇවිද යයි කුඹුරු මැද

වැව අරෙහෙ නිදි නැතිව
මේ ඇඳුම් මහපු බව
කිසිම වී කරලකට
ඇළ කියා නැත තවම...

බර කල්පනාවක

කිව්ව විදිහට මෝය කට ළඟ
බලන් හිටියත් එන තුරා ගඟ
කිසිම දවසක නැති ලෙසින් අද
සයුර මහ බර කල්පනාවක...

දැන දැන සිඹීම

ගෙල බදාගෙන
අඬන වේගෙට
නාය යන බැව්
හොඳින් දැන දැන

ගැහි ගැහී එන
වැහි වලාකුළු
තුරුළු කරගෙන
සිඹින කඳු ගැට..

ගැහැණු

පටුන
බලති..
පිටු
නොබලති...

තනපට

වළා තනපට
ලිහාගත් සඳ
බැබලි බැබලි
පැනපි එළියට. . .

විහාරමහාදේවී Park

අන්න පෙම්වත
ගාඩ්වරු එති
වහා සඟවනු
මැනවි බර අවි. . .