චූටි බුබුල

සිංහ කෝට් කාරයින්
බූරූ මේස් කාරයින්
පඩ ෂෝ ආගමිකයින්
ආගමික නිරාගමිකයින්
ඊනියා ප්‍රජාතන්ත්‍රවාදීන්
මැදවාසී අන්තවාදීන්
ගොබ්බ සමාජවාදීන්
හිඟන ධනවාදීන්
හැත්ත බුරුත්තම
පන්නා තනි වෙමි
චූටි බුබුල තුල

 

ලියා එව්වේ - Hare :-)

ඉලූෂන්!

තිර ඇරී වැසෙයි
සිදුවීම් දිග හැරේ
එකම කතාව
එක එක විදියට
එක එක අයගෙන්
සමහර විට...
එකම අයගෙන්

 

ලියා එව්වේ - Hare :-)

දේශපාලනික හිරිකිතය

පත්කර යැවූ පසු රොත්තක් මනාප දී
එලවාගනු නොහැක පේනා කපේකදී
දෙස් පාලනය ගොහොරුවකැයි ගිගුම් දිදී
ගොඩ සිට විරිත්තාගෙන අප අරන් බුදී

මඩක ලගින හරකුන් ඇත සුදු ඇඳලා
වෛවාරන්න පාටට අපෙ හිත බැඳිලා
පාටින් හීන දකිමින් ඇස් අන්ධ වෙලා
ඉපදුන කරුම කියමින් යයි නාකි වෙලා

 

ලියා එව්වේ - Hare :-)

ඔබ ඇයගේ ලොවට

සිවිලිමේ එල්ලී කැරකෙන
විදුලි පංකාවේ වේගය
වෙනස් නොවේ
ඔබෙ සුසුම්වලින්

වෙන්ව යා යුතුයි දැන්
ඔබත් මමත්
ඇයගේත් ඔහුගේත්
ලෝකවලට

 

ලියා එව්වේ - Hare :-)

අමරණීය තාත්තා

මිය ගියද
උත්ථානය ලබති
පියවරු
දරුවන් ගැබ

කතා කරති
මග පෙන්වති
ඕනෑ නම්
කණට ගසති

 

ලියා එව්වේ - Hare :-)

සංගීතය සහ දහදිය

ගී කියයි හිමිදිරියට
පාන්දරට ඉර පායනකොට
පිණි දියවී යනවිට
පැයකට දෙකකට

අට නමය වෙනකොට
ගිණි සැරට අව්වට
ගී නැත ඒ වෙලාවට
දහදිය හැරුණුකොට

 

ලියා එව්වේ - Hare :-)

යුද්ධය අත්හල රණ විරුවෝ

යුධ ගින්නෙන් මියැදෙනවුන් ගණන් දෙමින්
ගෙවු අතීත මතකය යලි අවුළුවමින්
නැවතත් මිය යයි වැසියන් පවුල් ලෙසින්
ජීවත් වීමේ යුද්ධය දිග් ගැසෙමින්

ජීවිකාව ගෙන යන්නට හැකි නැත්තේ
වැටුපක් කුලියක් උපයන්නට නැත්තේ
දරුවන් හඬන හඬ රැව් දෙන කන් මත්තේ
ඉවසාගන්න බැරි සීමාව ඉස්මත්තේ

 

ලියා එව්වේ - Hare :-)

ලන්ච් රූම් ප්‍රේමය

උදයෙත් දහවලෙත් ඇය මේසෙක එපිට
බත්මුල ලිහයි නිහඬව ඇයගෙම ලොවක
ලන්ච් රූමයේ වෙනකෙකු නැති අවට
ඇගෙ හැඩ විඳිමි මෙහි සිට මම ඇස් අගක

ඇගෙ කුසගින්න මට කුසගිනි වෙලාවෙම
දැණුනේ කොහොම මගෙ සිතුවිලි පුරා මම
හිත යට සිට නැගෙන පිබිදුම තලා බණ
ආදරේ ඇත්තෙ බඩවල අපෙ sync වුණ

 

ලියා එව්වේ - Hare :-)

ටවුන් එකේ කොන්ක්‍රීට් මුණි!

නගරයේ දියුණුවෙන්
උඹ අත්පත් කරගත් දේත්
නගරයේ දියුණුවට
උබට පුදන්නට නොහැකි වූ දේත්
අතර හිස්කම දුරු කරන්නට
හන්දි ගානේ වැඩ සිටිමි

 

ලියා එව්වේ - Hare :-)

මැරෙන මොහොතේ...

මැරෙන්න බය වෙයිද
නොවෙයිද
දැන්ම කියන්න බෑ මට

ඒත් මැරෙන මොහොතේ
ජීවත් වෙන උඹලා දිහා බලා
මම කියයි
"හොඳ වැඩේ තොපිට"

 

ලියා එව්වේ - Hare :-)

නැටි!

නැටි
තිබුණ නම්
අපට

වනල
වනලම
කැඩිල
මෙලහට

- ඉන්දික ගුණවර්ධන

නැටි
තිබුණ නම්
අපට

පොඩිකාලෙම කපයි
නැත්තං උගන්වයි
පු.කේම ගහන් ඉන්න

- මම

 

ලියා එව්වේ - Hare :-)

ලස්සන ගෙයක්!

මොකටද 
ලස්සන ගෙවල්
උස තාප්පයක්
හදාගත්තම

 

ලියා එව්වේ - Hare :-)

පුද්ගලික ලිපිගොනු පරීක්ෂා කල නිලධරයාගේ සිතුවිල්ල

තඩි මහත ලිපිගොනු
කඩදාසි පුරවපු
උවමනාම කඩදාසි නැති
අනවශ්‍ය ඒවයින් මහතැති

පිරුණු බව ෂෙයා කරන
ජීවිත අස්සෙ හිස් කමත්
ඒ වගේමදැයි හිතන්නට
මට අයිතියකුත් නැති

 

ලියා එව්වේ - Hare :-)

 

 

ප්‍රමුඛතා!

සුදු කැකුළු දෙකයි
ළූණු ගෙඩි තුනයි
හඳුන් කූරු පෙට්ටියයි
සීයගේ බඩු මල්ල
සම්පූර්ණයි

 

ලියා එව්වේ - Hare :-)