නවතින්න ?

ඇහිපිල්ලමක් යට
නවතින්න,
හැබැටම පිස්සුද..
තියෙද්දිත් ඉඩකඩ
ඇති තරම් මේ හදවතේ....

මොණරනැටුම් ගලට එන්න

වැහි බීරිම පාත් වෙච්චි
බක්මාසේ ළඟ දවසක
හීතල මීදුමත් එක්ක
මොණරනැටුම් ගලට එන්න

දිය සීරා රුරා යන
මොණරු නටන නැටුම් ගලට
පෑයුවත් හඳ නොපෑයුවත්
මොණරු එක්ක ගී ගයන්න
මතක ඇතුව කලිං එන්න

තරු වියනට යටින් එළුව
වැහි බීරිම යටින් ඉඳන්
තරු කීයක් පේනවාද
ගණන් කරලා මට කියන්න

පෙම්බරී

නාහෙට අහන්නැති
පෙම්බරී...නුඹ මට
ඉහල ගියත් එකයි
පහල ගියත් එකයි

නහය ගාවට ගිලුන
මගේ නහයට උඩින්
අඟලක් ගියත් එකයි
දෙකක් ගියත් එකයි

නුඹ හන්දා ජීවිතේම
පටලා ගත් මට දැන්
උන්නත් දාහයි
මලත් දාහයි

නුඹ

හැදී හැදී බිඳෙන සිත
කෙදිනක නතර වේද
දුක් විඳ විඳවමින් තව
හැපී හැපී හඬනු ඇත සිත
මතු මතු අහිමි නුඹ සිහිකර

තාමත්...

දහස් ගණනක්
ඇවිද ගිය ඒ
වෙරල වැලි මත
අප දෙපා සටහන්
වෙන්නැති...

අදත් යන එන
මගදී නැවතී
ඒ, පා සටහන්
සොයනවා මම
තවත් නුඹ
දන්නැතුවැති

අනවසර පිටපත

මංම ලිව්ව මගේම කවි
මං යනකොට පාර දිගේ
මට විකුණනවා
කන්න බොන්න නැති වුනාට
අතේ සතේ හිඟ වුණාට
මංම ලිව්ව මගේම කවි
සල්ලි දීලා ගන්න හිතෙනවා
"ගන්න සර් ගන්න අයියේ
අපේ කාලේ කලා ලෝකේ
නමක් තියලා මැරිලා ගියපු
කවියෙක් ලියු පට්ට සිංදු"

වැලපෙමු

වැළපෙන්න
තුරුළු කරගෙන
අතීතය
එනවාද
දවසක ඔබ
හැරදා
වර්තමානය