ඇඟලුම

සැම උදෑසනක
අවදිව දත් මැද
සෝදා මුව සූදානම්ව
ඇඟලාගමි
සිනහව පිරි
අනෙකාගේ මම නම්
ඇඟලුම

 

ලියා එව්වේ - Hare :-)

තහනම්!

තනි පාට කපරාරු 

ලස්සන තාප්පවල 

වස කැතට මැද තඩියට 

දැන්වීමක් ගසා ඇත 

දැන්වීම් ඇලවීම තහනම්

 

ලියා එව්වේ - Hare :-)

ආණ්ඩු සහ සොමි රැළි

ඉඳ හිට හෝදන් ගියත්
වෙරළ යළි ගොඩනැගෙයි
සියලු රැළි වෙරළේ වැදී බිඳී යයි
ඉතිං ඔබ එන්න රැළි හදන්
අපි වෙරළ වෙමු


ලියා එව්වේ - Hare :-)

ආමි නේවි එයා ෆෝස්

නිදහසේ වටිනාකම තියා

එහි තේරුමවත් නොදනිත්ද

මියන්මාරයේ ගිණි බිඳින 

අණට කීකරු යකඩයන්

උන්ට ඇත්තෙවත් නැද්ද ඔළුවක්

වැලපෙන හෘද සාක්ෂියක්

අරගලය ෆේල් යැයි සිතුවත්

දිවි පුදයි මිනිසුන් තාමත්

වචනෙන් රචනයෙන් ලස්සන

මනුසත්කම මහ මුලාවක්

ලෝකය එක යායක්නම්

ඇයි රටක් ගානෙ හමුදාවක්

ලියා එව්වේ - Hare :-)

උයන!

මල්ද පරව යයි
පත් වියලී වැටෙයි
උයන්පල්ලන් ස්ථාන මාරු වෙයි
උයන දරා වැජඹෙයි!

ලියා එව්වේ - Hare :-)

කිල් මයි ඩිජිටල් ලයිෆ්

මිනී මැරුමක
පවුල් අවුලක
පශ්චාත් ගොසිප්
දිග බුකි ලොජික්
පින්තූර නරඹමින්
හෑලි කියවමින්
තියරි හදමින්
දැනුවත් වෙමින්
අනුනුත් අප්ඩේට් කරමින්
ජනතාව හරි සතුටින්

ලියා එව්වේ - Hare :-)

පරණ මිනිහා

පේනවාද පිරිමි ගෑනු
නිදහස සොයන් යනවා
එක් හිතකින් ඈත් වී
වෙනත් එකකට ලං වෙනවා
මරණයත් ඉක්මවන් යන තරම්
ආදරේ වගෙ එකක වෙලෙනවා

ඉතින් ඒ පෙම් කතා වේදනාවක්නං
ඒ කනින් අහලා මේ කනින් විසි කරන්
හිත හයිය කරගනින්!
මොකද උඹ තාම
එක හිතකට ආදරේ කරන එක
ලෝකෙ හොඳම දේ කියල හිතන
පරණ මිනිහෙක්

ලියා එව්වේ - Hare :-)

ඝණ ද්‍රව වායු

'හරි අමාරුයි ඝණ එක්ක

ගිහින් වදිනවා හැම තිස්සෙම'

ද්‍රව එහෙම කිව්වා

'ඒකට මට....'

වායු කට ඇරියා

'මට උඹෙනුත් කරදරයි ද්‍රව...'

ඝණ නිහඬවම හිටියා

ලියා එව්වේ - Hare :-)

සරුංගල් රාත්‍රිය

නිරිත මෝසමෙන් ගුවන් බට
සරුංගල් විසි පහක් ගැණ
උදා වූ රාත්‍රී මැදියමකි

ගල් ගලින් දියකර මත්ව
රති සැපයෙන්ද තෘප්ත
මා උඳුවප් මිහිඳු සඳ යට

තුරු පත් නගන සිරි සිරිය
ගාලු පාර හූරන සක කෙලිය
ඈත උඩුබිරුලෑම විඳගෙන

සිමෙන්ති තාප්පය යා කරන
සුදු නූලක් විහිදුවමි
සරුංගල් පාවීමක මත්ව

ලියා එව්වේ - Hare :-)

සෝෂල් ජීවිතය

දුක් කතාවලට සෑඩ්මි
පුක් කතාවලට හාහාවෙමි
වැදගත් කතාවලට ලයික්මි
බලු පැටවුන්ට හාට්මි
නොදත් කතාවලට කට බලියමි
එකඟ නොවන විට රතු වෙමි
බුකි වෝලයේ ගාටමි
සෝෂල් ජීවිතේ ගෙවමි