December 25, 2015

අප හැරදා යන්න ගියේ....

කටු අකුලක
පිපි මලක් වගේ
රිදුම් පිරුණු
මේ ආදරයේ
පරවී ගිය
සුදු මලක් වගේ
ඇයි නුඹ
මෙලොවින් සමුගෙන
අප හැරදා
යන්න ගියේ....

December 22, 2015

නුඹ යන්න ගියා ....

සයුරට පෙම් බැඳි
රළක් වෙලා
නොසෑහෙන්න
ආදරේ කළා...
වෙරළේ පිය
සටහනක් වෙලා
හිටිහැටියේ නුඹ
යන්න ගියා ...

December 11, 2015

සී නියර්

මහ හඬින් 
තෙල ගැසූ
සීනියර් බාබරා
ප්‍රා.ලේහි 
ලිපි අතර
තනියෙන්ම
හිරවෙලා

December 8, 2015

කුණු අදින ගුණේ...

ඉඳුල් අතරින් මතුවූ
අතසුන් බෝනික්කියක දැක
පොඩි දුවට පෙම් බඳින
ගුණේ...
කකුල නැති පුටුවට 
පණ දෙන්න
උඹට පුළුවන්
ගුණේ....

October 26, 2015

ජීවිතය නිශ්ඵලයයි හැඟුණු අවස්ථා දෙකක් විය...
එකක්,
ඔබ මා වෙන්වුණු මොහොතය,
අනෙක,
මට මා මුණගැසුණු මොහොතය...

October 23, 2015

ඛේදවාචක‍ය (විනිශ්චය නුඹට...)

දස අවුරුදු බාල නැඟණිය
පුරුද්දට දුවන් විත්...
පනියි මගෙ ඔඩොක්කට
සුදු අයියේ.... සුදු අයියේ...
හිටි හටියේ අම්මා විත්
අනේ මගෙ පොඩි කෙල්ල
බහිනවා ඔඩොක්කෙන් බිමට..
වැරැද්ද......
සේයා ගෙද?? මීඩියා ගෙද??

October 21, 2015

අපූරු ඉරිදාව

සැනෙකින් විත් නුඹ ලඟට
පතන්නට සුබ පැතුම්
නුඹේ නව හැරවුමට
සිතුනත් මට....
නොහකිය මේ ජීවන පෙරලියේ
සිහිනෙන් විත් නුඹ ලඟට
පතන්නෙමි සුබපැතුම් අව්‍යාජව
හද පත්ලෙන්ම
අපූරු ඉරිදා සැන්දෑවේ....

October 19, 2015

නිදහස

ගලන ගගක්
තැන්නේ විදින
නිදහස
ජිවිතයේ නැතිද

October 16, 2015

වතුර වගේ කවි

අදහසක් හැඩකර
නිමවන කවියකට
තමන්ගේ හැඩ දෙන්න
තනන පඬියන් කොහෙද

නොයෙක් හැඩ ගෙන
විසිතුරු මවන
ජල පොදක් මෙන්
කවියකට ඉඩ දෙන්න
සිතේ හැඩ ගන්නට
සිත් සේ විඳෙන්නට

October 15, 2015

කොණ්ඩයා

සමාවෙයන් අයියෙ
මට උඹව
බේරගන්න බැරිවුණා

October 14, 2015

මහඟු ප්‍රේමය

රැයේ නින්දත් නොනින්දත් මැද
යොදුන් ගව්දුර අෑත නුවරක
සීතලේ ගුලි වෙමින් ඉකිලන
මහඟු ප්‍රේමය මහද සනහන
සිහිනයෙන් මෙන් ළඟට සපැමිණ
පුසුඹ ඉව කොට ගතේ දැවටෙත......

හඬක් නෙ‍ානගා විටෙක මතුවන
පෙනී නොපෙනී කෙමෙන් බොඳවන
සිත පහන් වී ඔබේ රුව දැක
දෙනෙත් අග කඳුළක්ය මතු වෙන

October 9, 2015

විශ්වයේ රෞද්‍රම බන්ධනයට හසුවී සිටියේය ඔහු...
ආදරය කිසිදා නොලබන්නට කවියෙක් ව සිටියේය ඔහු...

October 7, 2015

'චිහ්'

'තහ්' හඬින් වැටෙන
ගොම තලියට
'චිහ්' කියන මම
එපොහොරින්
පිපෙන මල් සිඹිමි
හිස පහත් කර....

October 5, 2015

නමුත්

මිහිදන්ය වසන්තය
සුපසන්ය අතීතය
නමුත් පිබිදේ
තුරින් තුර
අමිරි මතකය
බාඳුරා මලක් වී

October 1, 2015

ආදර කතුර

තව කිරිලියක් වෙත
පියඹන්න හිතෙනවා
ඒත් නුඹෙ ආදරේ
මගේ කටු කපනවා....

September 29, 2015

මා කවි ලියන කල අහස යට වෙහෙසින්
බලා හිඳියා ඈ තරුවකට වී රහසින්...

September 25, 2015

සිරස්තලය සහ කතු වැකිය

දෙදිනක් පුරා කෙළෙසූ තරුණිය
නිරුවතින් මහ පාරේ දමා ගිහින්
පින්තූර බලන්න
5වන පිටුවට යන්න
- සිරස්තලය

මේ දුෂ්ඨ අධම කුරිරු
අශිෂ්ඨ මාධ්‍ය භාවිතාව
සදාචාරවත් කරන්නට
මහජන මතය
ගොඩනැගිය යුතුයැ
-කතුවැකිය
දිලෙන මුදු තාරකා බැඳී ළංවී,
රටා තවරා අහස්තලයේ
තමන් අසලින් හිඳින තරුවක,
නැත කිසිම තරුවක් විසින් දුටුවේ
ගයන මුත් නේක තුටු ගී,
නඟා සත්සර ගුවන් තලයේ
ඔබේ හදවත තනිව හඬනා,
සියුම් මුදු හඬ මට ඇසේ...

September 23, 2015

අපරාධයට එරෙහිව!

අපරාධයේ
මස් කෑල්ල
හක්කෙන් හක්කට
මාරු කරමින්
තළු මරමින් හපයි
අපරාධ නොකරයි

September 21, 2015

සබඳ මේ නුබගැබ
මහා හඬ දි මතුදින
මඟහැරී තනිවුණ
කවියෙක් සොයා - වැළපෙනු ඇත...

September 17, 2015

මළ හිරු සිඳු මත දුක දියකර හැරියාවේ
අඩ සඳ කඳු මුදුනේ සැඟවී හිඳියාවේ
තරු කැට එකිනෙක ගිලිහී පොළොවට වැටුනාවේ
ඔබ එන තුරු මා තනිවී සිටියාවේ

September 15, 2015

වතුසුද්ද මල් ගහක් යට
ඉඳුවා තිබෙන රතු රෝස මල් පඳුරක් වෙත
එහි හටගත් මල් පොකුරක් වැන්න
ප්‍රේමය...

September 11, 2015

වියළී ගිය වැලි කැට අතර නූපදින වග ප්‍රේමය
මඟ හමුවෙන අනන්ත වාරයක
පවසා තිබුණි සුළඟට!

---------------------------------------------------

අහස් දියෙන් පිරී ගිය
ඉතා විරල ඝන වළාකුලක්
ගසාගෙන විත් සුළඟට
මහා කතරකට හරි ඉහළින් නැවතී හිඳින!

මා සබඳ,
වළාකුල
පාවී පාවී යනු මැන ඈතකට
ඈතින් පෙනන මිටියාවත දෙසට

ගඟ දිය දොළෙන් පිරී ගිය
ඒ මිහිරි මිටියාවේ හිඳ
හෙලනු මැන තුටු කඳුළක්
නොපෙනෙනා මුත් මා නෙතට
ගයනු මැන තුටු ගියක්
තුරු වැල් මල් පඳුරු ගැන
නො ඇසෙනා මුත් මා සවනට

September 7, 2015

නුදුරු දිනෙක
මා නොදන්නා නුහුරු තැනක
ප්‍රාණය වියැකී ගිය මගේ මෘතදේහය
ඔබ යනෙනා අතරමඟ ඔබට හමුවෙයි...

අඩවන් සිනාවකින් සැරසී ගිය
මගේ සුදුමැළි මුහුණත දෙස
කුළුඳුල් සිනාවක් හෙළනු මැන

විසිවී ගොස් කැබලි වෙන්වූ
ඔබේ දයාබර මතකය
මිය යන මොහොතේ
අවසානයේ මට සිහිවිය

එතැන් පටන් ඔබ යනෙනා අතරමඟ
ඔබ හට තනියක් දැනෙනා මොහොතක
විසිරී හිඳින අහස දෙස බලනු මැන

අකාශය පුරා දියවී ගිය මගේ විඩාබර ආත්මය
වළාකුළකට නැඟ
සිසිලක් වී ඔබ සමඟ පැමිණෙනු ඇත.

September 4, 2015

සතුටු වැස්ස

ඔය ඇස්වලට පුළුවන්
වැස්සක් වුණත් වස්සන්න
හැබැයි මම කැමති
කඳුළු වැස්සකට නෙමෙයි
සතුටු වැස්සකට

September 2, 2015

යළිත් ඔබ පෙර මෙන් මෙහි පැමිණෙනු ඇත
මීදුම් සේළ අතරින්
මොළකැටි සුළඟක් සේ
පිණිකැට වැස්සක් සේ

August 31, 2015

අවංක පෙම්වත් තැන

ඇයට ඔහු ගැන
ඇති අයිතිය
අහෝසි වූ පසු
වදන් වලට
අයිතිවාසිකම්
කීවාය.

හෙලබස ඇයට
පිටුපෑවේ නැත.

August 28, 2015

උසුළු

තරු කැට
උසුළු නොකරව
මතු පුරහඳ වන
අද අඩ සඳට....

August 27, 2015

දුයිෂේන් කියන්නේ,
ආදරේ ගැන කුඩා කවියක්. . .
කුර්කුවේඋවේහි පොප්ලර්, 
බලාපොරොත්තුව ගැන ලියපු හයිකුවක්. . .
පාව්කා කොර්චාගින්, 
ඇකෝඩියනෙක ස්වර පෙලක්. . .
රතු චතුරස්‍රෙ,
කහ ගැහුන නවකතාවක,
රණ ගීත දළු දාන පිටුවක්. . .!

August 26, 2015

නොනියත


මන්ද මාරුත
මාර සේනා
සිඳී සියපත
දළින් දළ
තුරින් තුර

August 25, 2015

ජේසුනී

රැගෙන ගොස් උන්
නීතියේ තුලාවත්
මනින්නට බදු කාසි
එහෙයින්
උට්ඨානු වනු මැනවි
පියාණනි
කුරිසි පත් වන්ට
පළමුව
කලියුගයේ අවසාන
දුගියාත්

August 24, 2015

ඇරඹුම හා නිමාව

ජීවිතය හරි පුදුම
හුදෙකලාවක සැඟව
ඈතටම ඇදී යන
දිනෙක යළි මතුව එන
නොසිතනා මොහොතකදි
නැවතීමෙ තිත තියන.......

ඇරඹුමක නිමාවද...
නිමාවක ඇරඹුමද...

ජීවිතය හරි පුදුම
නොසිතනා මොහොතකදි
නැවතීමෙ තිත තියන
නොසිතනා මොහොතකදි
නැවත පෙරටම ගලන....

August 21, 2015

ආදරය

මගේ පපුතුරේ රැඳි
සුදෝ සුදු හිස් පිටුවකි
ඔබේ අත්ලත ඇති
වෛවර්ණ ක්‍රෙයෝන් කූරු අහුරකි

August 20, 2015

මල් එක්ක සමනල්ලු ලස්සනට පෙනුණාට
ලස්සන ම මල් අයිති දළ තියෙන බඹරුන්ට
උනුහුමට ගුලිවෙන්න උරහිසක් තිබුනාට
සමනල්ලු නැතුවාම පාලුයි ලු මල් වලට

August 19, 2015

මං

දුර අහසෙ රෑ සඳට 
පෙම් කළා හුඟදෙනෙක්
ඒත් ඉන් ළං වුණේ ටික දෙනයි
මං එයින් එක්කෙනෙක්
මං නීල් ආම්ස්ට්‍රෝන්

August 18, 2015

මට ඇත්තම කියන්න!

ප්ලීස් ඩොක්ටර්,
මට ඇත්තම කියන්න,
මගෙ බඩේ පිපෙන්නේ මොන මල්ද?
පීරිසි වගේ පියෝනි මල්ද?
පැණි පිරුණු හත්පෙති මල්ද?
මේ තරම් සමනල්ලු පියාඹන්නේ ඒකද?

ඔය අතරෙ වල් රෝස පඳුරුත් තියෙනවද?
තියුණු කටු ඇනෙනවා රැවුම් පහරක් වැදෙනකොට
සමනල්ලු හිටි ගමන් මැරෙනවා දිගු දෙබැම සිහින් වෙනකොට

ප්ලීස් ඩොක්ටර්,
මට ඇත්තම කියන්න,
ලෙඩේ ඇත්තේ මල්වලද? සමනල් තටුවලද?

August 17, 2015

පසක් කළ සත්‍යය .....

එන විටත් නොගෙනාව...
යන විටත් ගෙන නොයන...
හිස්ම හිස් ඔලොගුවක් උර දරා
ඇවිද යමි සෙමෙන් පියවර තබා...

ඇත්තටම ජීවිතේ හරි බරයි...
සිතිජ ඉම අපැහැදිලිය-නොම පෙනෙයි...
හැරීමක් නොමැති මේ ගමන් මග
තනිව යමි ආ විලස තනිවම ම...

August 14, 2015

ප්‍රේමය විවෘත කර

කල් පනින්නට පෙරාතුව 
ප්‍රේමය
විවෘත කර සුවද
විදගත යුතුය...

අත්ලෙන් ලිස්සා නොයාමට
විලංගුලා
හදේ ගැඹුරක 
තැම්පත් කලයුතුය...

අතේ රේඛා කියැවුමට
තදින් ම
ඔබ සුරත
අල්ලා ගතයුතුය...

දුර ගමනක ඇරඹුමට
පෙරාතුව
ඔබ විසින්
පොරොන්දු දියයුතුය...

August 12, 2015

නොහමුවන්න ඈ..

ප්‍රේමයට අත වනමි
වියළි තුඟු තුරැක නැග
ම'පිසනා සුළඟින් යදිමි
ඈ නොහමුවන ලෙස
දැනේයැයි දුකෙන්
සුළඟටත් දුක.......

August 10, 2015

යුක්තිය

දෙවිදුන්ගෙ
රජු වූ
සක්විතිට
කොයිඹින්ද දෙවොලක්
එහෙවු මේ මනු ලොවේ
නුඹට අවනඩු
නැතිද
අසඩක්

August 7, 2015

විහගකට ඉතිරි කල

ගසකට තියෙනවා
සුරකිව තබා ගත්
කවියක්.

විහගුන් ඈත
ඉගිල ගොස්
නැවත ආ පසුව
කියවන්න ඉතිරි කල...ම

August 5, 2015

නිල් අහස කොයිතරම් දුරයිද?
ඒ තරම්ම ඔයා මට ළඟයි...

August 3, 2015

මිරිඟු

කවියෙකු දුටිමි
අනුභුතියක් ඇහිඳිනු අටින්
පරාජිත පෙම් සිත් බිමෙක‍
පැමිණ අතරමං වූ

July 31, 2015

කවි ලියන්න මම

කවියක් ලියන්න
පෑන කටේ දාගෙන කල්පනා කලත්
ඔලුවෙන් හිටගෙන කල්පනා කලත්
ඇස්දෙක පියාගෙන කල්පනා කලත්
මතක් වෙන්නේ එකම දෙයයි..
උඹ....
කොහේදෝ ඉදං ඇවිත්
ආදරෙයි කියලා අමුතුම ලෝකෙක අතරමං කරලා
උඹ හෙමීටම මාරු වෙලා...

July 29, 2015

හැබැහින් එන්න බැරි ඒකය

සිහින ඇතුලට නිතර හිස පොවමි.
දිවා සිහිනෙක රෝස පැහැයෙන් මත්වෙමි.
දිගැටි ඇහි දාර අග සරන්නෙමි.
බුහුටි අතැඟිලි අතර වෙලෙන්නෙමි.

අත්ල හොඳටෝම සීතලය
හැබැහින් එන්න බැරි ඒකය.
නොලියු කවි වැඩියෙන් රස ය.
ඇල්පෙනෙති තුඩුද මල් පුබුදා ය.

July 27, 2015

සරත් රැය

තාරුකා පවා
රහස් මුමුණන
සරත් රැය

July 24, 2015

දුම් රළකි පැල්පත් පියස්සේ

පිණිති වැහි අස්සේ
ලපැටි තේ දළු ගැස්සේ
කඳු හිස් අගිස්සේ
දුම් රළකි පැල්පත් පියස්සේ

July 22, 2015

කවුද අකැමැති
අරලිය මලක සුවඳට
සුපෙම් සුභ පැතුමකට
නොපිබිදෙන
කවියා කවුරුද?

July 20, 2015

ආදරේ සුනාමිය

ආදරේ සුනාමිය
හිසට ඉහලින් විහිදුනි
ඇහැට ලුණු දිය මුහුවුනි

හුස්ම ගන්නට අමතකව ගිය
තත්පරේකින් කාලක
දිය පිරී පෙණහළුද බරවුනි
"පටස්" ගා සිහිනයක් පිපිරුනි!

July 17, 2015

ජිග්සෝ ප්‍රහේලිකාවකි මම

බොකුටු හිසකේ රොදක්
මහ ගැඹුරු ඇස් දෙකක්
මන්දස්මිතයක් - කැතම කැත කැප් තොප්පියක්
සදහටම ගැලැවි ගිය
ජිග්සෝ ප්‍රහේලිකාවකි මම
දන්නෙවත් නෑ වගේ කොස්සන් හිනා පුපුරවන
පාලු හිස්තැන් තාම ඉඳහිට අතගාන

July 15, 2015

අතීතය

හිතුවෙ නෑ කීයටවත්
හිත රිදවන්න පුළුවන් කියලා
බස් ටිකට් එකකටත්...

July 13, 2015

හත්පෙති

ශේන්යා,
උඹේ පැණි වළලු කන්නට
කෙළ හලන බල්ලන්
නිදැල්ලේ

හත්පෙති මල් පරවෙලා
දැන් බොහෝ කල් නෙව
කෙල්ලේ

July 10, 2015

මල්වෙඩි

එක්වරම හදවතේ මල්වෙඩිල්ලක් පුපුරන
දහස් ගණනක් මතක කැබිලිති ඇවිලෙන
"සූස්!" හඬකින් දැවී උණුවෙවී බිම වැටෙන
මූසලම පාළුවක් පමණක් ශේෂ වෙන

July 8, 2015

පින්තූර

මදක් අවපැහැ වුව,
කලකට ඉහත විසි කල,
පින්තූරයක් ඇත තව,
කනප්පුව යටින් එබි එබී මග බලබල...!

July 6, 2015

බැරිම තැන අසමි.....

ඉස්සරම ඉස්සර ලෝකේ
පටන් ගත්ත දවස්වල
තරු පිපිරුණු වැසි වැටුනු
හිම වැටුනු දවස්වල
තැනක් නැතුව හදත් ඇවිත් 
නතර වෙච්චි දවස්වල
හරියටම මේ විදියට වෙන
ප්ලෑන ගහපු දවස්වල

ඔක්කෝම රාශි එකතු
කරපු කෙනා 
ගානට පිලිවෙලට 
තියපු කෙනා
කැරකෙන වේගේ
හදපු කෙනා
කේන්දරේ කොටු ටික
ගහපු කෙනා

පාගාවක් අල්ලසක් ජරාවක්
අරන්වත්ද
ආදරේට ලෝබකමක් ඉරිසියාවක්
හිතිලවත්ද
කවුරුන්හෝ කපන්න මා
කිව්වාවත්ද
නුඹ වෙනුවෙන් හිතක් එහෙම
පහලවෙලාවත්ද

සිකුරු තිබ්බේ ගොඩක් දුරින්
තරහටද
කේතු ආවේ මාත් එක්ක
ෆිට්එකටද
ඉරි ගහලා කොටුඇන්දේ
කහනවටද
නැන්දම්මේ ඕවා බැලුවේ 
පිස්සුවටද????

July 2, 2015

අත් 16 දෙවියන්ගේ පරිණාමය

වැඩි ගණනක් සාක්කු
හිස් කරන්නට තැත් කළ බැවින්
අත් කීපයක් වැඩෙන තරමට
අද වෙනකොට පරිණාමව

July 1, 2015

(වි)සම ලිංගික

සම්මතය
බහුතරය
සුළුතරය
හැතිකරය

June 29, 2015

ඔබේ ප්‍රේමය ඉවසමි

හිතවත,

ඔබේ ප්‍රේමය ඉවසමි
හැබැහින්
විසිකරලනු සවියක්
නැති හෙයින්....

අසමි මගේ රුවගුණ
හිලව්වට
මගේ දුක් ගී ඔබ
ඇසුව ණයට....

කියමි දවසේ කතා
නැතිකමට
මට සවන්දෙන
වෙනත් කෙනෙකු....

අගයමි ඔබේ ‍වෙහෙස
මා වෙනු‍වෙන්
කැපවෙන
ණයබර වැඩිකරන....

සිතමි ඔබේ පව
කවරදැයි
පෙම් කෙරුමට
මේ මෝඩ කෙල්ලට....

June 26, 2015

සුවඳ මල් පිපී තිබිණ
වසන්තය පැමිණි දින...

එතැන ආදරය පිරී තිබිණ
ඔබ මා මුණගැසුණු තැන...

June 22, 2015

ඔබට ප්‍රේම කිරීම
පුරුද්දකි
දිනපතාම
හිත කලඹවන
රහසකි....

ඔබට වසග වීම
මිහිරකි
ගැඹුරින් ම
හද කිතිකවන
හැගුමකි.....

බලා සිටීම
ශාපයකි
වේදනාවෙන් ම
සිත නිදිකරන
දඩුවමකි....

June 19, 2015

එවිට එය ආදරය මෙන්
ඔබට ඇසෙන්නට විය
සුසුමකින් ඔබේ හදවත
වෙලී තිබෙන්නට විය
ඔබත් මමත් අප දෙදෙන
අතීතයේ එක් දිනෙක
වයනු ලැබූ බටලී හඬක
කල්ප ගණනකට පසු ව
ඔබට එසේ අසෙන්නට විය...

June 17, 2015

මම

නෙත් කෙවෙනි
තෙමාලන
කඳුලක්ව ඉපදුණත්
සිනහවක් ලෙස වැඩී
දකින්නට වෙරදරමි
ලෝකය....

June 15, 2015

සොඳුර,
ඔබ මා හදවත සිපගත් තැන
මා සිහිනෙන් අවදිව බලන කල
කවියක් ඉපැදී තිබිණ
ළපටි ව

June 9, 2015

මැට්ටි..

දාල යනවා කිය කියා
හැමදාම ළඟින් ඉඳලා
දවසක
කියන්නෙම නැතිව
ගියා නේද?
මැට්ටි

June 5, 2015

සර්ව සම්පුර්ණ හීනයක්.....

ඔහු නොපවතින
ඔබ මා පමණක්
තනිව වන
සර්ව සම්පුර්ණ 
හීනයක්.....

පාට නොපෙනෙන
කළු සුදු පමණක්
ඇසට වන
ලොවකට විරුද
ප්‍රේමයක්.....

අපි දිය වී යන
මා පමණක්
හුස්ම හෙලන
ඔබට උරුම
හදවතක්....

June 3, 2015

මම තනි නොවෙන
මම ඔබේ වෙන
එක මොහොතක්.....

ඔබ ඔහුගේ නොවෙන
ඔබ මගේම වෙන 
මොහොතක්....

තත්පරයකින් සීයෙන් පංගුවක්
දිගයි ජීවීත කාලයකට 
වැඩියෙන් ටිකක්...

May 29, 2015

අනුරාධ මම නුඹේ රාධිකා

ආදරේ නාමයෙන්
නුඹව විශ්වාස කර
නුඹ සමග නිදි වැදුණු
අනුරාධ මම නුඹේ රාධිකා

නිරුවත්ව කාමරේ
මගේ මුළු ජීවිතය
නුඹේ අත තියද්දී
මොන නරුම හිතකින්ද
හංගලා කැමරාව
වීඩියෝ කෙරුවෙ නුඹ

සීතලේ පොළව යට
අද තනිව නිදන්නෙමි
අතීතය ගැන සිතා
තවම පසුතැවෙන්නෙමි
දිරාගිය ඇස්වලින්
කඳුළු උගුලුවන්නෙමි

May 27, 2015

මරණය

කීප සැරයක්
දඟල දඟලා
වළකවද්දිත්
ඇවිල්ලා
වැලඳ ගත්තා
නේද මරණය
පුංචි
කුරුමිණියෝ....

May 25, 2015

දැනෙන දුක

පහන් එළි නිවෙන විට
දැනෙන දුක මළුවකට
දැනෙනවා හදවතට
නුඹ ළඟින් නොමැති විට....

May 22, 2015

නුඹ

නිහඬ වූ විට ඇසෙන
සුපෙම්බර කවිය නුඹ
නෙත් පියූ විට ඇඳෙන
සුපෙම් සිතුවමකි නුඹ

May 20, 2015

පහන් සිල

පහන් වැටියෙහි 
දෙපා බැඳ ලූ
කසා වර්ණැති
සමනලයෙක්ද
පහන් සිල
ඉගිල යන්නට තටු ගසන

May 18, 2015

බණ

කහ සිවුරින්
නඩු  කිව්වට
මහ වෙහෙරට...
අපිට වඩා
නුඹ ඈතයි
අමා නිවනට...
බණ දෙසුවට...

May 15, 2015

ලොවට නොකියා පද ගලපගත්
අසම්මතයේ පෙම් කවිය නුඹ.....
පදෙන් පදයට ගැඹුරු අරුතින්
සිතම සනසන සෙත් කවිය නුඹ.....
දිනක යම්කිසි වරදකින් සුළු
ලොවම වනසන වස් කවිය නුඹ........
ඉතිං කුමකට කවිය වී ඔබ
සදා නොලියූ කවිය වනු ඔබ......

April 24, 2015

ඉකිලන පුලිගු

පිලිස්සුනු කරදහිය මත,
දකිමි
ඉකිලන පුලිගු
ඉදහිට......

March 30, 2015

දියවී ගොස් අහස් කුස,
වර්ෂාවෙන් හදවත පිරී ගිය සද,
ඔබ ගැන මතකය සිහිවී,
සිහිනෙන් මා හඬනා කල,
නෙතු අග මතු වූ කඳුලක්,
පුරන්වූ කතරකට බට,
මහා මේඝයකැයි ඔබ කීය....

March 27, 2015

මට Heart Attack!

මට  Heart Attack!
ඉතින් Doctor
මගේ හර්දය වස්තුවේ
පුන්චි පුන්චි
රිදුම් හැමදාම....
මේක ඉස්සෙල්ලම
පටන් ගත්තේ,
ශිශ්යත්ව පන්තියෙදි
ඊට පස්සෙ
0/L, A/L
Campus එකේදිත්
ටිකක්…
යාලු වෙන්න කලිනුත්
යාලු වුනාට පස්සෙත්......
අධ්යාපනයයි ප්‍රේමයයි
දෙකම,
සමහර වෙලාවට
ජීවිතේට විසයි,
Doctor…………………….

March 25, 2015

වියළි සිත

ගඟක් වී ගලා ගිය
අතීතය
ඉතිරි කර ගිය පුංචි
තෙත් බව
සෑහේද හටගන්නට
යළිත්
පෙම් මලක්

March 23, 2015

මරණ දැන්වීමකි ( පෙම්වතාට පෙම්වතියගෙන්)

රෝස කටුවක්
ඇනී
කිරිල්ලක මිය ගියා
ආදාහනය ඉරිදා
නෙලුම් මල් කනත්තේ
ඇගේ ලය සිදුරු වී
ගලා ගිය ලේ බිඳිති
කහට පැල්ලම්
ලෙසින්
පෙනේ මිහි සලුව මත
මීට පසු
සවස් යම
ඔබෙ කවුලු
නොහරින්න
ඈ යලිත්
මියුරු ලෙස
නොගයාවි
කිසිදාක.......................

March 18, 2015

තවත් වරක් අඳුරු වී සඳ,
පායා ඒ පසළොස්වක දින..
දෙබෑ කර හද අඳුර,
වලාකුලෙන් බැස එන්න...

March 11, 2015

මා නැතුව බෑ කියු
ඔබ ගොසින් ඉගිලිලා
වෙන හදක ගුලි වෙලා
මා තාම තනි වෙලා

March 4, 2015

හිස් කොළ

පෙර දිනෙක
ඇයට මට
සෙවන දුන්
මහලු නා ගස
ලිවිය හැකි නම් නුඹටත්
විරහ කවි
මං ගාව තියෙනවා
ඇති තරම්
හිස් කොළ

February 25, 2015

මගේ විරසක පෙම්වතී

මගේ චුම්බන
සිය ගණන් රැඳි
කොපුල හංගන්
යන අපූරුව 
මගේ විරසක පෙම්වතී

February 20, 2015

ආදරණීය රොස මල

රෝස මලක් නෙලුවිමි
නටු අග කටු නොදැක.

February 18, 2015

අලුත් කඳුළුක්

මම අලුත් කඳුළුක්
නමුත් නැහැ මට
අලුත් පාරක්
ගලා යන්නට
නුඹේ කොපුලේ
පෙම බිඳුණු කුමරී

February 11, 2015

මහලු ගැබිණිය

වියළි රෝස
කලලයක්
දරා සිටින
කවි පොත

February 4, 2015

බඹරෙකුගෙන් කවියෙකුට

කවියන් සිතන්නේ
බඹරුන් නපුරුමැයි
මල් අහිංසකමැයි
නමුත් මල් උයනක අතරමංව
දිනක් ගෙවූ
මා නොව දන්නේ
මල්වල අහිංසකකම්......

January 28, 2015

මතක ගඟ

දෝතට ගෙනත් ගඟ දිය
යළිත් දැමුවෙමි ගඟටම
අක්කා හංගන් මේ ගඟ
ගියපු හැටි සිහිවී

January 21, 2015

උයන්පල්ලෙක්මි

සුවඳ මල් නැති
ක්‍රෝටන් යාය යට
උඳුපියලිය මලේ
සිනහව
උපහාසයක් මට

January 14, 2015

ගඟවතුර

මා බලන්නට
නොආවෙන්
ඔන්න මම
නුඹ බලන්නට
ගෙදරටම ආවා

January 9, 2015

නොවිඳි පහස

විඳින්නට අකැමැතිව
මහ පොළවෙ මුදු පහස
කදුරු මල් බොහොමයක්
පරව ගියමුත් තවම
අතු අතර හිරවෙලා....

January 7, 2015

අසංවේදී

පුදුමයක් නොවෙයි
මේ දුරුතු සීතල නොදැනෙන්න
විරහවේ ගින්දර
තාම හිත ඇතුළෙ

January 5, 2015

පෙම් කලහ

වෙලාදෝ මෙතන
ඊයෙ පෙම් රණ්ඩුවක්
වැටී ඇත අළු කොබෙයි
තරුණ තටු කිහිපයක්...

January 2, 2015

රොබරෝසි තරහව

සිනිදු පර මල් 
වලින් ගැහුටව
රිදෙනවද?
සද්දන්ත පොළවට