කුරුලු හදවත

සොඳුර මා හෘදයේ මැහුම් පට තද කරගනිමි
දෙදරීමකට මග අවුරමින්
අපේ කතාව කුරුටු ගෑවෙන තරමට
පසෙකටව ඉඩ දෙමි නුඹට අහසේ සරන්නට

හේදෙන හිත

බස් රියේ වීදුරු ජනේලයෙ පිට පැත්ත
සෝදමින් ගලන ඝන වැසි දිය
හිත මතින් ගලා මතු කරයි අතීතය
හේදීම යන්නට දෙන්න ඕනෑ එයට

වරද

බුබුළු ලා කැකෑරෙන
වරද කළු කරයි හිත
දැවි අඟුරු වන තුරුම
අඳුරටම ඇදගෙනම

අමිත් ද සංඛ

වතුරට වැටුණි දඟලමි පීනනු බැරිව
විහින්ම ලියූ නව ගීයක් අත ඇතිව
ගයනෙමි පැරණි තාලෙට ගිය අමතකව
පිහිනා එගොඩ දැක එන තෙක් ඉන්ට දෙව

ස්පෝර්ටි!

එක්සයිස් කර හදාගත්
කඩවසම් සිරුරු
ක්‍රීඩකයින්ට හුරේ දමයි
බීම බොන කෑම කන
ක්‍රීඩා ලෝලීන් තරබාරු

ඡන්ද සූරක

ඇසෙයි ආයෙත් පැයේ කණිසමක්ව
බුද්ධියට අමතන ඒ මායා වදන
අරක්කු කාලට මාමක හදවතට
හසු නොවී පාවෙන්නන් අමතන

වෛවර්ණයෙන් සුමට අකුරින්
මිටි පිටින් මුද්‍රිතව බෙදෙන
පසුව කුණු ව රීසයිකල් වන
කියවන්න ප්‍රතිපත්ති ප්‍රකාශන

උඹ වගේම එකෙක්!

ඕනෑ වී නැද්ද උඹට
උඹ වගේම එකෙක්
උඹ දන්න දේවල්වලට පෙරේත
උඹටත් පෙරේත හිතෙන දේ දන්න
උඹව වටේ යවන ගමන්
ඌත් වටේ යන
දෙන්නම සෙට් වෙන තැන
අනිත් උන්ට නොතේරෙන
රස ලෝකයක් මැවෙන
ඕනෑ නැද්ද උඹට
උඹේ රහම තියෙන එකෙක්
තනිව දරාගෙන ඉන්න
හැමදේම බෙදාගන්න

වැලපිල්ල ඇවිලිල්ල

පිපිරෙන
කූඹින් පළඟැටියන්...
උන් ගැන දුක් වෙන්න
එන්න
මේ ගිණ්න අවුළුවන්න
ඇවිලිලයි වැලපිල්ලයි
දෙකක්

අවුරුදු ෆිසික්ස්

මේ අවුරුදු කාලේ
කටේ කලු කුහර
ඊට පසු පණු නාල

කොකිස් නෙබියුලා
කැවුම් ග්‍රහ මණ්ඩල
දොදොල් අඳුරු පදාර්ථ
ආස්මි මන්දාකිණි
පොකුරු පිටින්

නැතිනම් පුකේ
සුදු කුහර
ඇඟයි වෙන්නෙ
ප්‍රසාරණය

වෙඩිම

මං ආදරේ කරන...
දරුවෙක් එක්ක හරි
මං බාරගන්න කැමති
කෙල්ලෙක්
මගෙන් අහනකොට
කවද්ද වෙඩිම ? කියලා...
දෙන්න හිතෙනවා දෙකක්
හොම්බ තැලෙන්න
ඒකිට තියෙන ආදරේ
පැත්තක දාලා